एक गमंत सांगू तुला

एक गमंत सांगू तुला ...खरंच खूप आवडतोस तू मला

हल्ली मोबाइल -लॅपटॉप मधून नसते सवड तुला
इनबॉक्स ला मिळालाय माझ्या वाटचा वेळ सगळा 
आपल्या वायरलेस प्रेमाचा रंगच मुळी  निराळा 
 तरी तू प्रेमाचा टाकलेला एक कटाक्ष पुरा झाला

एक गमंत सांगू तुला... खरंच खूप आवडतोस तू मला

मुद्दाम माझ्यासाठी असं काही खरेदी करीत  नाहीस
पाडव्याची साडी संक्राती ला घेतोस हे काही थोडे नाही
नाही घेऊन गेलास तरी  चालेल रोज बागेत फिरायला
दोघात एकच प्लेट भेळ ऑर्डर करतोस ना खायला

म्हणून ...... खरंच खूप आवडतोस तू मला

पावसामध्ये दोघांनी चिंब भिजावं अशी अपेक्षा नाही
लॉंग ड्राईव्ह ला नेणारा तू काही फिल्मी नवरा नाही 
पावसावरचं गाणं लागतोस जेव्हा तू गुणगुणायला 
स्वतःहून सर्दीचा काढा  आणून देतोस  प्यायला

म्हणून ..... खरंच खूप आवडतोस तू मला

घराच्या दारावर तुझ्या नावाची असेल जरी पाटी
कवितेतील शब्द माझे असतील पण लिहिले  तुझ्यासाठी
अर्थ आलाय तू येण्यामुळे माझ्या निःशब्द भावनेला
अजून काय सांगू ..... खरंच तू खूप आवड्तोस मला